Ukrainada nam qazanğan jurnalist, Ukraina Arbiy-deñiz quvetleriniñ «Briz» radiomerkeziniñ sabıq baş muarriri Miroslav Mamçak Aqyarda ukrain radiostantsiyası eşitilgenini bildire. İşbu radionıñ olacağı aqqında ukrain haber siyaset naziri Yuriy Stets ilân etken edi.
Bunı Mamçak öz Facebook saifesinde bildirdi.
Ukrain radiostantsiyasını Qırımnıñ memuriy merkezinde de eşitmege mümkün. Şu cümleden, Qırım.Aqiqat Aqmescitte «Ukrain milliy radiosı» ve «Era» radiosınıñ mündericesini yayınlağan radioefirni tapıp oldı.
Ukraina haber siyaset naziri Yuriy.Stets Qırım.Aqiqatqa yarımadada ukrain raiosınıñ olacağını tasdiqladı ve tezden efirde mahsus Qırım sakinleri içün azırlanğan programmalarnıñ eşitilecegini qayd etti.
«Söz qırımtatar tilinde çıqacaq informatsion mahsulat ve ayrı rus tilli programmalar aqqında kete. Mündericesi Ukrainada, şu sıradan Qırımda olayatqan adiselerge bağlı olacaq», – dedi o.
Nazirniñ aytqanı kibi, qırımlılar içün ukrain radiosınıñ mündericesi üzerinde qırım jurnalistleri çalışacaq.
«Tehnikiy ceetten çalışmağa başladıq endi, şimdi signalnı tarqatırmız, programma mahsulatınıñ işlep çıqarılması – bu edni bir qaç künlük bir sual», – dedi Stets.
İşğal etilgen Qırımda ukrain radiosınıñ peyda olacağı aqqında Yuriy Stets bildirgen edi, bunıñ ile Rusiye istilâcısı signalnı qolay yoq etip olamaycağını da qayd etti.
Ukrain kanallarınıñ yayınlavı Qırımda 2014 senesi mart ayında, işğalden soñ toqtaldı.
