İslâm-Terek rayonınıñ Seyit Eli (Juravki) köyünde qırımtatarlarnıñ maşinalarını teşkermeknen beraber politsiya hadimleri köy sakinleriniñ silânı tutuv şaraitlerini de teşkereler, dep bildire qırımtatar milliy areketiniñ falli, Qurultaynıñ Merkeziy saylav komissiya reisi Zair Smedlâyev.
Bunı o Facebook saifesinde yazdı.
«Köyde silâsı olğan adamlarnıñ onı tutuv şaraitlerini teşkerler. Meraqlısı şu ki, aynı vaqıtta hırsızlanğan mototsiklni ev, dolap, bilgisayar ve cep telefonlarında qıdıralar, olarnı bir de bir vesiqasız alalar. Qırımtatarlarnı qorqutmaq içün daa bir aktsiya», – dep yazdı o.
Smedlâyevniñ aytqanına köre, Qırımda internet qullanıcılarını sıñırlaycaq olalar.
«Köyümizde eki kün devamında internet yoq edi, bugün elektrikler yoq edi. İnformatsion alannı yoq etecek olalar, ATRni qapattılar, şimdi internet qullanıcılarını da sıñırlaycaq olalar. Tezden telefon bağı olmasa, iç şaşırmam», – dep qayd etti faal..
Qırım.Aqiqat bildirgeni kibi, aprel 2-de saba Seyit Eli (Juravki) köyünde politsiya blok-postlarnı tiklep, qırımtatar timsalleri ile maşinalarnı teşkermege başladı.
