Avropa Şurasınıñ Baş kâtibi Thorbjørn Jagland Qırımda ATR telekanalına litsenziyanıñ berilmemesi sebebinden qasevetlenip, onıñ işini ğayrıdan tiklemege çağırdı.
Bu aqqında aprel 2-de tarqatılğan beyanatta aytıla.
«Farqlı malümat bergen matbuat vastaları em Qırım, em de bütün Avropa içün ğayet müim ola», – aytıla beyanatta.
Avropa şurasınıñ Baş kâtibi Qırım akimiyetini telekanal reberligi ile dialog qurmasına çağırdı.
«İnsan aqları Avropa konventsiyasında kefil etilgeni kibi, mustaqil matbuat vastaları malümat ve ğayelerni bermek kerekler», – dep qayd etti Thorbjørn Jagland.
Aprel 1-den itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.
Telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.
