Link açıqlığı

Celâl qırımlılarnı Rusiye ordusına çağıruv aqqında: er kes özü qarar almalı – hızmet etmek ya da yoq


Qırımtatar Milliy Meclisi reisiniñ birinci muavini Nariman Celâlnıñ fikirince, Rusiye ordusında askerlik yapmaq ya da ondan vazgeçmek meselesi er bir Qırım qorantasında ayrı baqılmaq kerek.

Bunı o, Rusiye ordusına çağıruvnı izaatlap, Qırım.Aqiqatqa bildirdi.

«Qırımda qalıp, bugünki uquq alanını qabul etip, genç, qorantası Rusiye vatandaşı pasportını alsa, olar Qırımdaki qanunlarğa köre askerlik yapmağa mecburlar. Qanunğa köre vazgeçüvniñ bir sıra menfiy aqibetleri bar», – dedi Celâl.

Celâlnıñ aytqanına köre, daa bir variant Qırımnı terk etmek.

«Lâkin olar (askerlikke çağırılğanlar – muar.) Ukrainada da askerlik olğanını añlamaq kerekler, vaziyet tınç degil, er kesni askerlikke çağıralar. Men kene de tekrarlamaq kerekim: er bir qoranta özü qarar almaq kerek», – dep ayttı Meclis reisiniñ birinci muavini.

Meclisniñ askerlikke çağrılacaq qırımtatarlarnıñ sayısı aqqında haberi barmı sualine Celâl böyle bir malümat olmağanını ayttı.

Aprel 1-den itibaren Rusiyede orduğa çağırmağa başlaylar. Bu sene Qırım sakinleri ilk sefer Rusiye ordularına askerlikke çağırılacaq. Böylece, Rusiye Mudafaa nazirliginiñ malümatına köre, tahminen 500 Qırım gençi Rusiye Silâlı Quvetleri saflarına kirecek. Olar yarımadada hızmet etecekler, dep bildireler Rusiye mudafaa nazirliginiñ resmiy vekilleri.

XS
SM
MD
LG