Ukraina Rusiye ile büyük bir cenk zıddiyetine azır olmaq kerek. Bunı Qırımtatar Milliy Meclisiniñ reisi Refat Çubarov bildirdi, – dep haber ete «Ukrinform».
«Men daa beterine azırlanmağa çağırğanlardan biri olam – Rusiye ile cenkke azır olmaq kerek», – dep ayttı Çubarov aprel 1-de «5 kanal» efirinde.
Onıñ aytqanına köre, yarımada devletniñ terkibine bütünley qaytarılğan soñ Ukraina içün cenk bitken dep sayılacaq.
«Ukrainanıñ ayrı topraqları duşmanda qala bile degen fikirler Ukraina içün telükeli ola. Bizler Ukrainanı tüşünsek, qomşular tarafından ürmet etilgen ve özüni ürmet etken memlekette yaşamaq istesek, Qırımnı qaytarmaq kerekmiz. Qırım Ukraina devletine qaytarılsa, cenk bitecek», – dep qayd etti Çubarov.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
