ATR qırımtatar telekanalınıñ reberligi belgisiz şahıslar tarafından içtimaiy ağlarda teşkil etilgen provokatsiya aqqında bildirdi, – dep haber ete Qırım.Aqiqat. ATR telekanalı baş müdiriniñ muavini Lilâ Bucurova Facebook saifesinde bildirdi ki, içtimaiy ağlarda telekanal Hersondan yayınlamağa azırlanıp, para toplay degen haber peyda oldı.
Bucurova ilânğa inanmamağa çağırıp, onıñ müelliflerini «ya dolandırıcı, ya da provokatorlar» dep adladı.
«İlânnıñ müellifleri – bizim problemlerimiz sayesinde para qazanacaq olğan adiy dolandırıcılar ya da ATR «halqtan para istey» dep, bizni qabaatlaycaq olğan provokatorlar ola bile. ATR bir yerge köçmey, telekanal Qırımda qalıp, para toplamay», – dep ayttı Lilâ Bucurova.
Malüm olğanı kibi, aprel 1-den itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.
Telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.
