Qırım adliyecisi Cemil Temişev bildirdi ki, ATR telekanalına qoltutuv levhasını çıqaracaq olğan faalniñ işi Aqmescitniñ Kiyev rayon mahkemesinde «qabaatlarnen» keçirildi.
Bunı Temişev Qırım.Aqiqatqa bildirdi.
«Menim fikirimce, mahkeme qabaatlayıcı tesiri ile keçirildi. Memuriy vesiqalarda qabaatnı isbatlaycaq deliller yoq eji. Yalıñız politsiya hadimleri sorğuğa çekildi. Başqa deliller, foto, video yoq edi. Men bu qabaatnıñ ne qadar alçaq derecede olğanını artıq aytmayım. Bir qaç genç bağçada toplaşıp, nizamnı bozmadı ve devletke bir şey qarşı aytmadı, ATRge qoltutmaq içün içtimaiy levhanı çıqardı. Bu sebepten olarnı memuriy mesüliyetke çekmek olmaycaq bir şeydir», – dep ayttı adliyeci.
Qanunsız mitingniñ teşkil etilmesi içün 20 biñ rublege ve yaqalanğanda qarşılıq köstergeninden sebep 500 rublege cezalanğan faal Aleksey Yefremov mahkeme qararına itiraz bildirip, «küreşni bitirmeycegini» ayttı.
«Qabaatlı olğanımnı tüşünmeyim. Bizler çetke çekilip, ATR telekanalı, söz serbestligine qoltutqanını bildirdik. Bizler itiraz bildirecekmiz. Yeñecegimizge ümüt etem, eñ azından da, para cezasını ödep, toqtamaycağımızğa ümüt etem. Bizni ne para cezası, ne de cemaat işleri qorqutır», – dep ayttı Yefremov.
Qırım.Aqiqat bildirgeni kibi, Aqmescitniñ Kiyev rayon mahkemesi ATR qırımtatar telekanalına qoltutmaq maqsadı ile levhanı çıqaracaq olğan yedi insandan birine para cezasını berdi. Mahkeme Aleksey Yefremovnı «qanunsız mitingniñ teşkilâtçısı» olaraq tanıp, onı «yaqalanuvğa qarşılıq köstergeninde» qabaatladı.
Studentlerni mart 30 künü Aqmescitniñ Vorontsov bağçasında politsiya yaqaladı. Olar Aqmescit bağçasında toplaştılar, lâkin levhanı çıqarıp başlağan soñ politsiya hadimleri peyda oldılar. Olarnı yaqalap, bölükte üç saatten ziyade tuttılar.
Studentlerniñ aytqanına köre, olarğa aqqlarını seslendirmeyip, ruhiy basqı yaptılar.
Studentlerni «qanunsız mitingniñ keçirilmesinde» qabaatlaylar.
Adliyeci Cemil Temişev toplaşuvnıñ başqa künge keçirilmesini istedi, amma mahkeme ruhset bermedi. Onıñ malümatına köre, yedi talebeni ayrı mahküm etecek olalar.
Aprel 1 kününden itibaren ATR işini toqtattı. Telekanal martnıñ soñuna qadar Rusiye qanunlarına köre kütleviy haber vastası olaraq öyle de qayd olamadı.
