Link açıqlığı

Kiyev – Yayınlav yerinde qara ekran. Aprel 1-den dünyada yekâne ATR qırımtatar telekanalınıñ yayınlavı toqtaldı. Soñki gece jurnalistler bir-birine qol tutmaq içün iş yerlerinde qaldı, telekanal yolbaşçılığı ise qayd etilmek içün ep areket etecegine işandıra.

Telekanalnıñ bugünki müiti ve jurnalistlerniñ keyfi aqqında Qırım.Aqiqatqa ATR telekanalınıñ baş müdir muavini Lilâ Bucurova tarif etti.

– ATRniñ birinci süküt künü nasıl keçti?

– Bugün er kes işke keldi. Kollektivniñ umumiy toplaşuvı keçti, mında telekanalnıñ tesisçisi ve baş müdiri çıqışta bulundı. Er kesni işke devam etmege çağırdı: bilgisayarlarımıznı temizleymiz, iş yerlerimizde cıyıştıramız ve ileride ögümizde olğan vazifelerimizniñ planlarını yazamız. Bazarertesine qadar er kesni evlerine yolladı, çünki insanlar raatlıqqa, böyle stressten soñ, belki de, ruhiy reabilitatsiyağa, muhtaclar. Raatlıq künleri, tatil ya işten boşatuv degil. Bazarertesine qadar raatlıq. Bazarertesi kelecegimizge planlarımıznı yazacamız.

– Telekanal hadimleriniñ keyfi nasıl?

– Kollektivniñ ruhiy alı aqqında aytacaq olsaq, tünevin olğanından biraz eyice. Tünevin studiyamızdaki saatlarğa baqıp, şapıldata, qolumıznı yüregimizde tutıp, gimnni diñley edik, çoqusı ağlay edi.

Bugün endi er şey canlı şekilde keçe. Közyaş, şikâyet yoq. Cenkâver keyfimiz bar, desem de olur. Er kes şimdi daa da küçlü olğanımıznı dey.

– Telekanalnıñ qapatılmasına seyircilerniñ seslenüvi aqta ne ayta bilesiñiz?

– Er şey devam ete. Bugün işke kelsem – telekanalnıñ binası ögünde kene insanlar tura. Bizim qapılarımız endi er vaqıt açıq. Alâ daa mektüp yazalar, destegini bildireler.

– Telekanal hadimleri şu yaqın vaqıtta ne yapacaq?

– Şimdi vesiqalı leyhalar üzerinde çalışacaqmız, belki, İnternette aşkâr etmek içün haber portalı şeklinde bir şey yapacaqmız. Ögümizde nasıl alan açılacağını daa bilmeymiz, amma bugün endi işimiz çoq. İşimizge devam etecemiz.

– Yayınlavnı qıtaiy Ukrainadan keçirmek kibi ğayege nasıl munasebette bulunasıñız?

– Şimdi qıtaiy Ukrainada Refat Çubarov ve Mustafa Cemilev bulunalar, amma öz iradesi ile degil… Biz de öz istegimiz ile Qırımnı terk etmemiz. Halqımız içün çalışamız ve onı qaldırmamız.

XS
SM
MD
LG