Link açıqlığı

Qırımlılar ATR telekanalınıñ qapatılmasına razı olmadılar


ATR telekanalı ve Meydan radiosı qapatılsa da, Aqmescitniñ bir çoq sakini yayınnıñ ğayrıdan tiklenmesine ümüt etip, televizor ve radiolarnı qoya. Bunı Aqmescitniñ sakinleri Qırım.Aqiqat keçirgen soravda ayttılar.

«Çalışmağanlarını bilem, amma kene de qoyam. Bu kanalnı ayatımıznıñ bir parçası olaraq sayğan edik. Mence, cemaat bu kütleviy haber vastalarına birdemlik kösterip, arzu ve serbestligini aks ettirmek kerek», – dep ayttı Qırımtatar Milliy Meclisi prezidiumınıñ azası Bekir Mamut.

Al-azırda yayın olmasa da, adamlar telekanalnıñ işi ğayrıdan tiklenecegine ümüt eteler.

«Tünevin soñki saniyege qadar ARTni seyir ettim, pek qasevetlendim, bütün qoranta darıldı. Saba uyandım ve ATRni qoydım, anda ise boş ekran. Buña iç alışmadıq. Amma tezden bu bitecek ve bizler ATRimizge kene de quvanacaqmız, dep tüşünem», – dep ayttı QMPU birinci kurs studenti.

Malüm olğanı kibi, aprel 1-den itibaren ATR işini toqtattı. Mart ayınıñ soñuna qadar telekanal Rusiye qanunlarına köre öyle de qayd olamadı.

Telekompaniya Roskomnadzorğa vesiqalarnı bir qaç kere bergen edi, lâkin olarnı farqlı sebeplerden keri qaytarğan ediler. ATR mediaholdingine kirgen Lâle qırımtatar bala telekanalı, «Meydan» ve «Lider» radioları da aynı vaziyetke oğradılar. «15 minut» internet neşiri ve QHA da Rusiyede qayd etip olamadılar.

Qırımtatar kütleviy haber vastaları arasında Rusiyede yalıñız «Golos Krıma» gazetası qayd oldı, gazeta rusça çıqa. Neşirniñ malümatına köre, gazetanıñ cemi olaraq 6 biñ nushası çıqacaq ve yañı adı olacaq – «Golos Krıma New».

XS
SM
MD
LG