Aqmescitniñ Kiyev rayon mahkemesi ATR qırımtatar telekanalına qoltutmaq maqsadı ile levhanı çıqaracaq olğan yedi insandan birine para cezasını berdi. Qırım.Aqiqat mühbiriniñ bildirgenine köre, mahkeme Aleksey Yefremovnı «qanunsız mitingniñ teşkilâtçısı» olaraq tanıp, onı «yaqalanuvğa qarşılıq köstergeninde» qabaatladı.
Yevremovnı qanunsız mitingniñ teşkil etkeninden sebep 20 biñ rublege ve yaqalavğa qarşılıq köstergeninden sebep 500 rublege cezaladılar.
Aleksey Yefremov qabaatını red ete. Onıñ aytqanına köre, o, yaqalanğanda qarşılıq köstermedi.
Mahkemede eki politsiya hadiminden ğayrı diger şaatlar sorğuğa çekilmedi, – dep haber ete Qırım.Aqiqatnıñ mühbiri.
Adliyeci Cemil Temişevniñ bildirgenine köre, imaye «Moskva ve İnsan aqları Avropa mahkemesine qadar şikâyet etmek» niyetinde. Onıñ qayd etkenine köre, «deliller pek az».
Qalğan iştirakçiler mahkeme binasınıñ yanında bulunalar, olarnıñ mahkemesi soñra ötkerilecek.
Qırım.Aqiqat bildirgeni kibi, aprel 1-de, saba, Aqmescitniñ Kiyev rayon mahkemesinde ATR qırımtatar telekanalına qoltutmaq içün levhanı çıqarmağa niyetlengen yedi studentke nisbeten toplaşuv başlandı.
Studentlerni mart 30 künü Aqmescitniñ Vorontsov bağçasında politsiya yaqaladı. Olar Aqmescit bağçasında toplaştılar, lâkin levhanı çıqarıp başlağan soñ politsiya hadimleri peyda oldılar. Olarnı yaqalap, bölükte üç saatten ziyade tuttılar.
Studentlerniñ aytqanına köre, olarğa aqqlarını seslendirmeyip, ruhiy basqı yaptılar.
Studentlerni «qanunsız mitingniñ keçirilmesinde» qabaatlaylar.
Adliyeci Cemil Temişev toplaşuvnıñ başqa künge keçirilmesini istedi, amma mahkeme ruhset bermedi. Onıñ malümatına köre, yedi talebeni ayrı mahküm etecek olalar.
Aprel 1 kününden itibaren ATR işini toqtattı. Telekanal martnıñ soñuna qadar Rusiye qanunlarına köre kütleviy haber vastası olaraq öyle de qayd olamadı.
