Qırımtatarlarnıñ milliy yetekçisi Mustafa Cemilev ve Meclis reisi Refat Çubarov aprel 1 künü Avropa birliginiñ ileri ekspertleri ile körüşüvni keçirecekler. Onıñ çerçivesinde ATR midaholding terkibine kirgen qırımtatar matbuat vastalarını umumavropa leyhasına çevirmege teklif etecekler.
Bunı Refat Çubarov öz Facebook saifesinde bildirdi.
Onıñ malümatına köre, körüşüvde belli siyasetçiler de olacaq.
«2015 senesi mayıs 21-22 künleri olacaq AB Riga sammitiniñ meselelerini muzakere etecekmiz. Teklifim –ATR telekanalı, «Lâle» bala kanalı ve «Meydan» radiosı, qırımtatar elektron matbuat vastaları olaraq, umumavropalı medeniy leyha olmalı. Menimce, meni añlarlar...», – dey Çubarov.
Aprel 1 kününden ATR yayınlavı toqtaldı. Buña sebep – Roskomnadzor tarafından yayınlav izniniñ berilmemesidir.
Teleşirket bir qaç kere Roskomnadzorğa vesiqalarını bere edi, amma çeşit sebeplerden olarnı qaytara ediler. ATR şirketine kirgen Lâle qırımtatar bala telekanalı, «Meydan» ve «Lider» radiosı, «15 minut» internet neşiri de şimdi aynı vaziyettedir.
Qırımtatar matbuat vastalarından Rusiye qaydını yalıñız rus tilinde basılğan «Golos Krıma» gazetası aldı. Neşirde aytılğanı kibi, gazeta endi 6 biñ nusha ve «Golos Krıma New» serlevası ile çıqacaq.
