New Yorkta Rusiye elçihanesi yanında ATR qırımtatar telekanalına qol tutuv numayışı keçti. Mında Halqara çerkes Şurasınıñ vekilleri iştirak etti, haber ete «Tuapse press» saytı.
Neşirniñ yazğanı kibi, aktsiya iştirakçileri Rusiye akimiyetiniñ qırımtatar halqına nisbeten qanunsız areketlerine, şu cümleden ATR telekanalınıñ qapatılmasına diqqatnı çektiler.
Toplanğanlar ellerinde: «Don’t kill ATR», «Hands off ATR», qırımtatar milliy bayraqlarını tuta edi.
Aprel 1 kününden ATR yayınlavı toqtaldı. Buña sebep – Roskomnadzor tarafından yayınlav izniniñ berilmemesidir.
Teleşirket bir qaç kere Roskomnadzorğa vesiqalarını bere edi, amma çeşit sebeplerden olarnı qaytara ediler. ATR şirketine kirgen Lâle qırımtatar bala telekanalı, «Meydan» ve «Lider» radiosı, «15 minut» internet neşiri de şimdi aynı vaziyettedir.
Qırımtatar matbuat vastalarından Rusiye qaydını yalıñız rus tilinde basılğan «Golos Krıma» gazetası aldı. Neşirde aytılğanı kibi, gazeta endi 6 biñ nusha ve «Golos Krıma New» serlevası ile çıqacaq.
