Aprel 1-de, saba, Aqmescitniñ Kiyev rayon mahkemesinde ATR qırımtatar telekanalına videorolikni çıqarmağa niyetlengen yedi studentke nisbeten toplaşuv başlandı.
Qırım.Aqiqatqa studentler haber etkeni kibi, olarnı mart 30 künü Aqmescitniñ Vorontsov bağçasında politsiya yaqaladı.
«ATR telekanalına destek videosını çıqarğanımız içün mahkemege çağırdılar. Sutdentler Aqmescit bağçasında toplandı, amma video çıqarmağa başlağanda, bir yaqtan politsiya hadimleri kelip çıqtı. Yaşlar başta ketecek edi, amma soñ ğayeni soñuna qadar amelge keçirmek içün qaytıp keldiler. Politsiya olarnı yaqalap, bölükke ketirdi, mında 3 saatten ziyade tuttılar», – tarif ete QMPU studenti Elvina.
«Aqlarımıznı oqup bermediler, ruhiy basqı yapıldı», – dedi qız ve işbu areketlerni «insan aqları üzerinde horlav» olaraq adladı.
Studentlerni «qanunsız mitingniñ keçirilmesinde» qabaatlaylar.
Adliyeci Cemil Temişev toplaşuvnıñ başqa künge keçirilmesini soradı. Onıñ malümatına köre, yedi talebeni de ayrı maküm etecek olalar.
Aprel 1 kününden ATR yayınlavı toqtaldı. Buña sebep – Roskomnadzor tarafından yayınlav izniniñ berilmemesidir.
Teleşirket bir qaç kere Roskomnadzorğa vesiqalarını bere edi, amma çeşit sebeplerden olarnı qaytara ediler. ATR şirketine kirgen Lâle qırımtatar bala telekanalı, «Meydan» ve «Lider» radiosı, «15 minut» internet neşiri de şimdi aynı vaziyettedir.
Qırımtatar matbuat vastalarından Rusiye qaydını yalıñız rus tilinde basılğan «Golos Krıma» gazetası aldı. Neşirde aytılğanı kibi, gazeta endi 6 biñ nusha ve «Golos Krıma New» serlevası ile çıqacaq.
