Roskomnadzor tarafından çalışuv iznini alıp olamağan ATR qırımtatar telekanalınıñ yolbaşçılığına telekanalnı satmağa teklifler kele edi. Bunı Aqmescitte matbuat konferentsiyası devamında telekanal tesisçisi Lenur İslâmov bildirdi, haber ete Qırım.Aqiqat mühbiri.
«Ebet (teklifler – muar.) bar edi. Bu kibi: «Ya satarsıñ, ya küçnen alırımız. Onı aldıq, şunı aldıq, bunı da alırmız. Seni birev qorumağa kelir dep belleysiñmi? Alırmız, oldı ketti». Ana, canlı efirde bunı aytam. Neticede: qapılarımız açıq, keleceklerni bekleymiz. Telekanalnı, server, qıtlıq, er şeyni almaq mümkün. Amma kollektivni tutıp almağa mümkünmi? Kollektivni satmaycam. Satuv aqta söz ketmey. Noqtaiy-nazarımızdır, biz böylemiz. Öylemiz, mında, evdemiz – biz ile işleñiz. Ne içün şu akimiyet biznen iç bir leyha da yapmadı?», – dey İslâmov.
O şunı da bildirdi ki, ATR telekanalınıñ yolbaşçılığı yarımadada öz seyircileri içün çalışmağa areket etecektir.
Aprel 1 kününden ATR yayınlavı toqtaldı. Buña sebep – Roskomnadzor tarafından yayınlav izniniñ berilmemesidir.
Teleşirket bir qaç kere Roskomnadzorğa vesiqalarını bere edi, amma çeşit sebeplerden olarnı qaytara ediler. ATR şirketine kirgen Lâle qırımtatar bala telekanalı, «Meydan» ve «Lider» radiosı, «15 minut» internet neşiri de şimdi aynı vaziyettedir.
