Bağçasarayda Qırımtatar Milliy Meclis reis muavini İlmi Ümerovnıñ evinde tintüv keçti. İlmi Ümerov bildirgeni kibi, Taqiqat komitetiniñ hadimleri bir şey tapmadılar, protokol tizip, evden kettiler. O, tintüv «fevral 26» işi boyunca keçkenini tasdiqladı.
«Bir şey tapmadı, protokol tizip, kettiler. Oñaytsızlıq içün afu soradılar. Fevral 26 künü boyunca cinaiy iş açıldı, oña köre Ahtem Çiygoznı kütlevi nizamsızlıqnıñ azırlanuvında qabaatlaylar. Men endi ekinci kere sorğudam. Ahtem Çiygoznıñ menfaatını qorçaladım, çünki o er vaqıt insanlarnı tınçlandırmağa tırışa edi», – dey İlmi Ümerov.
Qırım.Aqiqat bildirgeni kibi, salı künü mart 31-de Qırımda Rusiye Federatsiyasınıñ Taqiqat komitetiniñ hadimleri Qırımtatar Milliy Meclis reisiniñ muavini İlmi Ümerovnı sorğuğa çektiler. Yedi saatlik sorğudan soñ, taqiqatçılar Ümerovnıñ Bağçasaraydaki evine tintüv ile kettiler.
Evel İlmi Ümerovnı Qırım Taqiqat kоmitetine «fevral 26» işi boyunca endi çağırğan ediler, o, sorğuda Ahtem Çiygoznıñ menfaatını qorçaladı.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler. Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Rusiye Taqiqat komiteti Meclis reis muavini Ahtem Çiygoznğa 2015 senesi fevral 19-na qadar, soñra mayıs 19-na qadar apis müddetini belgiledi.
Qırım Taqiqat komitetiniñ malümatına köre, fevral 26 künü vaqiaları çerçivesinde şaat olaraq 150 insan sorğudan keçti, zarar körgen 40 insan belgilendi ve 2 şahıs mesülietke çekildi.
2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.
