Qırımda Rusiye Federatsiyasınıñ Taqiqat kоmitetiniñ hadimleri Qırımtatar Milliy Meclis reisiniñ muavini İlmi Ümerovnı sorğuğa çektiler.
Qırım.Aqiqatqa Ümerovnıñ tuvğanları sorğu yedi saat devam etkenini bildirdiler. Olarnıñ sözlerine köre, taqiqatçılar Meclis reisiniñ muavinini «fevral 26» işi boyunca «bir qaç doğruluv sual bermek içün» çağırdılar.
Sorğunıñ bitkeninen taqiqatçılar Ümerovnıñ Bağçasaray evinde tintüvni keçirmege qarar aldılar. Al-azırda uquq qoruyıcı organlarınıñ hadimleri taqiqat areketlerine devam etmek içün Bağçasarayğa yol ala.
Bunı Qırımtatar Milliy Meclis reisi Refat Çubarov bildirdi.
Evel İlmi Ümerovnı Qırım Taqiqat kоmitetine «fevral 26» işi boyunca endi çağırğan ediler, o, sorğuda Ahtem Çiygoznıñ menfaatını qorçaladı.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler. Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Rusiye Taqiqat komiteti Meclis reis muavini Ahtem Çiygoznğa 2015 senesi fevral 19-na qadar, soñra mayıs 19-na qadar apis müddetini belgiledi.
Qırım Taqiqat komitetiniñ malümatına köre, fevral 26 künü vaqiaları çerçivesinde şaat olaraq 150 insan sorğudan keçti, zarar körgen 40 insan belgilendi ve 2 şahıs mesülietke çekildi.
2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti.
