ATR birinci qırımtatar telekanalınıñ yolbaşçılığı yarımadada seyircileri içün yayınlavnı devam ete bilecegine ümüt besley.
Bunı Aqmescitte matbuat konferentsiyası devamında telekanal saibi Lenur İslâmov bildirdi, haber ete Qırım.Aqiqat mühbiri.
«Olğanını köremiz, dayanmağa, çare tapmağa, saqlanmağa tırışacaqmız, nasıl şekilde olacağını daa bilmeymiz. Ukrain litsenziyası, qırım liztsensiyasınıñ keçici müddeti, sputnik, internet bar, qanuniy negizni ögrenip, sizge haber etermiz», – dedi o jurnalistlerge.
Telekanalnıñ saibi aytqanı kibi, milliy siyaset – hususiy bir alan ve mında müddetni sozmaq ya da bürokratiya ile oğraşmağa mümkün degil.
«Menim içün bir şeyniñ qapatılması ile bağlı birinci matbuat konferentsiyasıdır, pek kederlidir, amma bunı yapmağa mecbur olacaqmız. Vatanımızda kereksiz oldıq. Amma, bunıñ ile er şey bitmez, ğaliba. Mında akimiyet temsilcilerini körmege ister edim. Akimiyet er şey halq içün yapmalı», – dedi İslâmov.
O şunı da qayd etti ki, kanalnıñ qıtaiy Ukrainağa keçmek niyeti yoqtır.
«Qıtaiy Ukrainağa ketmege niyetimiz yoq, ketsek, qırımtatar cemiyeti içün sürgünlik olacaq. Mında qaldıq ve qalmaq kerekmiz», – dedi İslâmov.
Aprel 1 kününden ATR yayınlavınıñ toqtatılması mümkün. Eger de telekanal martnıñ soñuna qadar Rusiye qanuniyetine köre matbuat vastası olaraq qayd etilmese, işi toqtatılacaq.
Teleşirket bir qaç kere Roskomnadzorğa vesiqalarını bere edi, amma çeşit sebeplerden olarnı qaytara ediler. ATR şirketine kirgen Lâle qırımtatar bala telekanalı, «Meydan» ve «Lider» radiosı, «15 minut» internet neşiri de şimdi aynı vaziyettedir.
