Qırımtatar Milliy Meclisiniñ reisi Refat Çubarovnıñ fikirince, halqara toplulıq Rusiyeniñ Qırımda insan aqları ve serbestligini bozuv areketleri içün onı cezalamaq kerek.
Bunı o, Kiyevdeki Qırımda İnsan aqlarını qorçalav halqara konferentsiyasında ayttı, dep haber ete Qırım.Aqiqat.
«İnsan aqlarına riayet etilmesi aqqında aytsaq, Ukraina, halqara teşkilâtlar, diger memleketlerniñ Rusiyege insan aqlarına riayet etilmesi mevzusında tesir etecek saalarnı aytmaq kerekmiz. Ne içün Ukraina biznesi anda biñlerce mal alıp kete? ATRni qapatalar, vaziyetke tesir ete bilecek cemaat teşkilâtları ne içün susıp otura?», – dep ayttı Meclis reisi.
«Rusiye insanlarğa qadaplanğanınıñ aqibetlerini is etmek kerek», – dedi o.
Mart 31-de Kiyevde Qırımda İnsan aqlarını qorçalav halqara konferentsiyası başlandı. Onı Ukrainada Birleşken Milletler Teşkilâtınıñ inkişaf programması yardımı ile keçireler. Tedbirde Ukraina ombudsmeni Valeriya Lutkovskaya qayd etti ki, Rusiye işğal etken Qırımda tuvğanları ile qonuşmaq aqqı bozula, qırımtatar halqı ise ekinci sürgünlikke oğray.
