Salı künü, mart 31-te, Kiyevde «Qırımda İnsan aqları: esabat beremiz, seslenemiz, yañartamız» halqara konferentsiyası başlandı.
Qırım.Aqiqatnıñ mühbiri bildire ki, tedbirge halqara ve ukrain uquq qorçalayıcı teşkilâtlarnıñ vekilleri, Ukraina Yuqarı Radasınıñ insan aqlarından vekâletlisi Valeriya Lutkovskaya, Qırımtatar Milliy Meclisiniñ reisi Refat Çubarov ve digerleri keldiler.
Ukrainada Birleşken milletler teşkilâtı sistemasınıñ koordinatorı Nil Uoker tedbir siyasetnen bağlı olmağanını qayd etti.
«Mında insan aqları aqqında laf kete. Qırım işğali devamında BMT Qırımda İnsan aqları 10 monitoring missiyasına yardım etti», – dedi o.
Konferentsiyada baqılğan birinci mesele – yarımadada bir sıra kütleviy haber vastası, şu cümleden qırımtatar matbuat vastalarınıñ qapatılma havfı.
Tedbir teşkilâtçıları arasında – Ukraina Yuqarı Radasınıñ insan aqlarından vekâletlisiniñ kâtibiyeti, İnsan aqları malümat merkezi, Vatandaş azatlığı merkezi, İnsan aqları Ukrain Helsinki birligi, «Almenda» vatandaş maarifiniñ merkezi, İnsan aqları gençler areketi (Rusiye).
Konferentsiya Ukrainadaki Birleşken Milletler Teşkilâtınıñ inkişaf programması yardımı ile keçirile.
