Link açıqlığı

Qırımnıñ paytahtı Aqmescitniñ merkeziy avtovokzalında qıtaiy Ukrainada yerleşken şeerlerge qatnağan avtobuslarnıñ biletlerini satmağa başladılar. Bunı bazarertesi künü, mart 30-da, «Novosti Krıma» bildire.

Neşirniñ malümatına köre, Novoalekseyevka, Odessa, Nikolayev ve Hersonğa qatnağan avtobuslarnıñ biletleri satılmaqta.

Avtovokzal kassasında bildireler ki, avtobuslar «Çonğar» ve «Kalançak» kiriş noqtalarından keçeler. «Sizler Rusiye sıñırından keçesiñiz, soñra ukrain kiriş noqtasına qadar cayav ketesiñiz, ve ukrain tarafında sizni diger avtobus ala», – dep ayttı kassa hadimi.

Mında er kün «Çonğar» kiriş noqtasına qadar ketken avtobusqa bilet almaq mümkün. Biletniñ fiyatı 155 rubleni teşkil ete.

Malüm olğanı kibi, Qırım ve qıtaiy Ukraina arasında demir yol ve avtobus alâqaları dekabr ayınıñ soñunda havfsızlıq maqsadları ile toqtatılğan edi.

XS
SM
MD
LG