Link açıqlığı

Qırım prokuraturası Meclis reisiniñ muavini Nariman Celâlnı tenbiyeledi


Qırımtatar Milliy Meclisiniñ reis muavini Nariman Celâl

Qırım prokuraturasınıñ vekilleri bazarertesi künü, mart 30-da, Qırımtatar Milliy Meclisiniñ reis muavini Nariman Celâlğa «ATR telekanalınıñ faaliyetini toqtatuv ile bağlı qanunsız aktsiyalarnıñ teşkil etmesi ya da iştirak etmesi aqqında» ihtarlarnı seslendirdi. Qırım.Aqiqat saytı bildire ki, bunı Celâl Facebook saifesinde bildirdi.

«Qırım prokuraturasınıñ güzel bir hadimi ekstremizm ile küreş merkeziniñ hadimi ile beraber evimni ziyaret etip, menim tarafımdan ATR telekanalınıñ faaliyetini toqtatuv ile bağlı qanunsız aktsiyalarnıñ teşkil etmesi ya da iştirak etmesi aqqında tenbiyelediler. Vesiqanıñ kopiyasını adet üzre bermediler. Tenbiyelendim, işte», – dep yazdı Nariman Celâl.

Malüm olğanı kibi, Qırımtatar Milliy Meclisi ATR telekanalınıñ qayd etilmemesi Birleşken Milletler Teşkilâtınıñ İnsan aqları deklaratsiyasınıñ 16-ncı maddesini boza, dep bildirgen edi.

Qırım.Aqiqat bildirgeni kibi, dünyada yekâne olğan ATR qırımtatar telekanalı yarımadada işini toqtata bile. Rusiye qanunlarına köre qayd olamağanından sebep ATR mediaholdingine kirgen diger kütleviy haber vastalarınıñ da aprel 1-den itibaren işini toqtatması mümkün.

XS
SM
MD
LG