«Herson» ava limanından Türkiyeniñ İstanbul şeerine ketken yolcularnıñ aman-aman yarısı – Qırım sakinleridir. Bunı Turkish Airlines şirketiniñ Hersondaki temsilciliginiñ baş müdiri Dinçer Saici matbuat konferentsiyasında bildirdi, dep haber ete Qırım.Aqiqatnıñ mühbiri.
Onıñ aytqanına köre, al-azırda İstanbul-Herson-İstanbul ava seferlerine qoşulğan qırımlılarnıñ sayısı 40% teşkil ete, lâkin Ukraina ve işğa etilgen yarımada arasında avtobus ve demir yol alâqaları olsa edi, olarnıñ sayısı daa çoq ola bilir edi.
«Ümüt etem ki, vaziyet eyilişecek ve naqliyat meseleleri vatandaşlarğa uyğun şekilde al etilecek», – dedi Dinçer Saici.
Qırım.Aqiqat mühbiriniñ keçken sene ava seferlerinden faydalanğan yolcularnıñ sayısı aqqında sualine Turkish Airlines temsilcisi raqamlarnı aytmayıp, «bu köstergiç ava seferlerinden kâr kelgenini isbatlay», dep qayd etti.
Onıñ bildirgenine köre, tamir işlerinden soñ Herson ava limanı bir saatte 400 yolcunı keçirecek.
Ava limanınıñ müdiri Grigoriy Usik vilâyet bücetinden on million grivna ayırılacağına ümüt ete. Para bina tamiri ve donatmalarnıñ satın alınmasına sarf etilecektir.
Usikniñ aytqanına köre, ava limanınıñ eñ büyük probleması çalışacaq adamlar.
«Ukrainada ava seferleriniñ havfsızlığı boyunca aviadispetçer ve diger mütehassıslarnı azırlamaylar. Biz bu meseleni böyle çezemiz: işten boşatılğan arbiylerni işke qabul etip, vatandaş aviatsiyasında çalışmağa ögretemiz», – dedi o.
Malüm olğanı kibi, Rusiyeniñ Qırım işğalinden evel Turkish Airlines Aqmescit-İstanbul ava seferlerini kerçekleştirgen edi. Lâkin 2014 senesi oktâbr 15-ten başlar ava şirketi Herson-İstanbul seferlerine başladı.
Qıtaiy Ukraina ve Qırım arasında demir yol alâqaları lâğu etilgen soñ Turkish Airlines yolcuları içün Qırım-Herson-Qırım avtobusını teşkil etti.
2015 senesi mart 29-dan itibaren «Turkish Airlines» ava şirketi İstanbul-Herson-İstanbul ava seferi er kün olacağını vade etken edi.
