Link açıqlığı

Qırım müftiyatı ve cemaat Qalğa Sultannıñ sarayını qorçalamağa tırışalar


Qırımda alim ve cemaat erbapları eskiden Aqmescitte yerleşken Qalğa Sultan sarayınıñ yerinde qurucılıq işlerini acele sürette toqtatmağa çağıralar.

Qırım musulmanları Diniy idaresiniñ matbuat hızmeti bildire ki, mart 28-de Qırım müendislik pedagogika universitetinde «Aqmescitniñ tarih-medeniyet mirasını ögrenüv ve saqlap qaluv meseleleri. Qalğa Sultan: tarihı, atiqiyatı, ögrenüv meseleleri» mevzusında tögerek masa olıp keçti. Tedbirde alim, cemaat erbapları, Qırım müzeyleriniñ vekilleri, Qırım Medeniyet nazirliginiñ hadimleri iştirak ettiler. QMDİ adından tedbirde Qırım Müftisiniñ muavini Ayder İsmailov iştirak etti.

«Tögerek masa» iştirakçileriniñ aytqanına köre, Qalğan Sultan sarayı yerleşken yerni saqlap qaluv problemi bar, çünki mında çoq qatlı evni quracaq olalar. Faqat bu yerde arheologik medeniy qatlamını tapmaq içün mahsus tedqiqler keçirilmedi, bu sebepten bir de bir qurucılıq işlerini keçirmek imkânsızdır.

Tögerek masanıñ iştirakçileri tarihiy kompleks yerinde qurucılıqnı toqtatıp, arheologik işlerge başlamağa çağırdılar. Böyle talap Qırım Devlet şurasınıñ reisi, komitetler ve nazirliklerge yollanğan rezolütsiyada qayd etildi.

Qırım musulmanları Diniy idaresi 10 yıldan berli bu topraqnı QMDİge berilmesini talap ete. Bu yerde başlağan qurucılıq işlerinden soñ Qırım musulmanları Diniy idaresi Qırım prokuraturasına muracaatta bulunıp, Aqmescit şeer şurasınıñ bu topraq damartısını ayırmaq qararını teşkermege rica etti.

Qalğa – Qırım hanlığında handan soñ kelgen unvan. Bu rutbeni I Mengli Giray han kirsetken edi. Qalğa vazifesine Geraylar sülâlesiniñ şahzadeleri tayinlengeni içün olarğa nisbeten «qalğa sultan» adı qullanılğan edi. Qalğanıñ merkezi Aqmescit şeeri olğan edi.

XS
SM
MD
LG