Link açıqlığı

Rusiye içki işler nazirligi: Qırımda «Hizb ut-Tahrir» tarafdarlarınıñ sayısı dört qat eksildi


Yarımada Rusiye terkibine qabul etilgen soñ Qırımda «Hizb ut-Tahrir al-İslami» teşkilâtı tarafdarlarınıñ sayısı dört qat eksildi, dep bildirdi mart 3-te Rusiye Federatsiyası İçki işler nazirliginiñ ekstremizm ile küreş idaresiniñ yolbaşçı muavini Vladimir Makarov, dep haber ete RİA Novosti.

Onıñ bildirgenine köre, bu yarımadanıñ ealisi, şu cümleden qırımtatar gençleri arasında keçirilgen qorçalayıcı tedbirlerniñ neticesidir.

«Qırımnıñ Rusiye terkibine qoşulması bizge yañı vazifeler berdi. Ve bugünge qadar vaziyet orta rusiyeli seviyege qadar eyileşti. Böylece, yapılğan qorçalayıcı tedbirler sayesinde yasaq etilgen «Hizb ut-Tahrir al-İslami» terroristik teşkilâtı tarafdarlarınıñ sayısı 10 biñden 2,5 biñge qadar eksildi», – dedi Makarov Rusiye prezidenti yanında İnsan aqları şurasınıñ toplaşuvında.

Yanvar 23-te Aqyar civarında Rusiyeniñ FSB hadimleri üç adamnı yaqalap, evlerinde tintüv keçirdiler. Aynı bu künü mahkeme olıp keçti, yaqalanğanlarnı 2 ayğa apiske aldılar. Olarnı Rusiyede yasaq etilgen Hizb ut-Tahrir teşkilâtınıñ faaliyetini teşkil etüv ve iştirak etüvde şekleyler. Üçü de Ukraina havfsızlıq hızmetiniñ nezareti altında bulunğan edi, lâkin olarnıñ Hizb ut-Tahrir ile alâqaları öyle de isbatlanmadı.

Rusiye 2014 senesi mart ayında Ukraina ve Ğarp tanımağan referendumdan soñ Qırımnı işğal etti.

XS
SM
MD
LG