Link açıqlığı

Mart 30-da Aqmescitniñ Demir yol rayon mahkemesi ukrain şairi Taras Şevçenkonıñ hatıra merasiminde Ukraina bayrağını qullanğan Qırım faali Kurtseit Abdullayevni mecburiy işler ile cezaladı. Faalniñ adliyecisi işbu qarardan Moskvada şikâyet etmege niyetlene.

Bunı mahkemeden soñ Abdullayevniñ adliyecisi Cemil Temişev jurnalistlerge bildirdi, dep haber ete Qırım.Aqiqat mühbiri.

Adliyeciniñ fikirince, Ukraina bayrağınıñ qullanması yasaq etilmemek kerek.

«Al-azırda Qırım sakinleriniñ vatandaş aqları sıñırlana. Şimdi Ukraina bayrağını qullanmağa yasaq eteler, yarın daa beter ola bile. Sağlam tüşüngen er bir adam buña qarşılıq köstermek kerek», – dedi adliyeci.

O, Qırım mahkemelerinde adalet olmaycağına emin.

«Mence, Qırımda kerçekni tapamaycaqmız, belki de, Moskvada», – dep ayttı Temişev.

Qırım.Aqiqat bildirgeni kibi, Aqmescit Demir yol rayon mahkemesinde mart 30 künü Aqmescitte mart 9-da ukrain şairi TarasŞevçenko hatırasına keçirilgen aktsiyada iştirak etken Kurtseit Abdullavniñ işi boyunca mahkeme toplaşuvı keçti. Oña ceza olaraq 20 saatlik mecburiy işler berildi.

Malüm olğanı kibi, Aqmescitte «politsiya» hadimleri Şevçenko doğğan kününe bağışlanğan mitingniñ teşkilâtçısı Leonid Kuzmin ve daa eki iştirakçini yaqaladılar. Politsiya hadimleriniñ sözlerine köre, sebep – mitingde ukrain timsalleriniñ olması. Mahkeme üç faalni mecburiy işler ile cezaladı. Faaller mahkeme qararına şikâyet ettiler.

XS
SM
MD
LG