«Golos Krıma» qırımtatar gazetası Roskomnadzor (Alâqa, informatsion tehnologiyalar ve bağ nezaret federal hızmeti) tarafından kütleviy haber vastası olaraq qayd etildi.
Bunı gazetanıñ baş muarriri Eldar Seitbekirov QHAğa bildirdi.
«Bizler neşirniñ qayd oluv şeadetnamesini aldıq, bizler ğayrıdan qayd oldıq. Ve bu cuma künü gazetanıñ yañı sanı çıqacaq. Neşirimiz «Golos Krıma New» adını taşıycaq. Cemi 6 biñ nusha çıqacaq, bizler çalışmağa devam etemiz», – dep ayttı neşirniñ baş muarriri.
Eldar Seitbekirovnıñ qayd etkenine köre, Milletlerara munasebetler ve sürgün olunğan grajdanlarnıñ işleri boyunca devlet komiteti açılmasını ilân etken Gasprinskiy adına Qırımtatar matbuat merkezine kirmeycek.
Bir sıra qırımtatar kütleviy haber vastası Rusiye qanunlarına köre qayd olıp olamay. Böylece, Roskomnadzor ATR telekanalınıñ vesiqalarını bir qaç kere keri qaytarğan edi.
ATR mediaholdingine kirgen «Lâle» telekanalı, «Meydan» radiosı, «Lider» radiosı, «15 minut» portalı aprel 1-den itibaren işni toqtatmağa mecbur ola bileler.
