Mahküm etilgen Qırım faali Kurtseit Abdullayev Aqmescitniñ Demir yol rayon mahkemesiniñ qararı ile razı degil. Malüm olğanı kibi, mart 30 künü mahkeme oña memuriy bozuluvdan sebep – Aqmescitte mart 9 künü Taras Şevçenko hatırasına keçirilgen aktsiyada Ukraina bayrağını kötergeninden sebep mecburiy işlerni berdi.
«Soqaqlarnı sipirmecem», – dedi o Qırım.Aqiqat mühbirine ve evel aytqanı kibi, mecburiy işlerniñ yerinde 15 kün apiste oturmağa razıdır.
O, qanunsız iç bir şey yapmağanını tüşüne ve bunı mahkemelerde isbaatlamağa azırdır.
«Qanunsız bir şey yapmadım ki. Bu devletniñ bayrağını elimde tutmağa aqqım bar edi, çünki Şevçenko ukrain şairidir. İtirazımnı bildirecek olam, Qırımda toqtalmam, ğaliba, Moskvağa barıp yetecekmiz», – dedi faali.
Аqmescit Demir yol rayon mahkemesinde mart 30 künü Aqmescitte mart 9-da ukrain şairi TarasŞevçenko hatırasına keçirilgen aktsiyada iştirak etken Kurtseit Abdullavniñ işi boyunca mahkeme toplaşuvı keçti. Oña 20 saatlik mecburiy işlerni maküm ettiler.
Malüm olğanı kibi, Aqmescitte «politsiya» hadimleri Şevçenko doğğan kününe bağışlanğan mitingniñ teşkilâtçısı Leonid Kuzmin ve daa eki iştirakçini yaqaladılar. Politsiya hadimleriniñ sözlerine köre, sebep – mitingde ukrain timsalleriniñ olması. Mahkeme üç faalni mecburiy işler ile cezaladı. Faaller mahkeme qararına şikâyet ettiler.
