Aqmescitte Şevçenko hatırasına miting teşkilâtçısı Leonid Kuzminniñ memuriy işinde apansızdan 44 saife peyda oldı. Bunı Qırım faali bazar künü, mart 29-da, Facebook saifesinde bildirdi.
«Bugün bildirüvni elde etim. Mahkeme memuriy işni ve itiraz arizasını Qırım Cumhuriyetiniñ Yuqarı mahkemesine yolladı. Amma böyle bir sual: mart 12 künü iş 18 saifeden ibaret olsa, bugün 62-den. Bu 44 saife qaydan alındı?», – yazdı Kuzmin.
Bu beyanatnı izaatlap, mitingniñ daa bir iştirakçisi Veldar Şukurciyev onıñ işinde de qoşma saife peyda olğanını bildirdi.
«Seniñ işiñ de mahkemeden soñ semirdimi?», – dep yazdı Şukurciyev.
Malüm olğanı kibi, Aleksandr Kravçenko, Leonid Kuzmin ve Veldar Şukurciyev mart 9 künü ukrain şairi Taras Şevçenkonıñ hatıra aktsiyasında yaqalandılar.
Bundan soñ, mart 12 künü, mahkeme toplaşuvı keçti. Mında ukrain timsalleriniñ qullanuvı aqta qabaat seslendirildi. Faallerge 40 saatlik mecburiy iş belgilendi.
