Qırımlı ukrain yırcısı Camala ATR yekâne qırımtatar kanalına destegini ve teleşirketniñ Qırımdaki işi devam etecegine ümüdini bildirdi.
«Qırımtatarlar içün ğayet müim medeniy adise – qırımtatar telekanalınıñ peyda oluvıdır. Qırımtatarlar nice manialardan keçip, Vatanına qayttı, şimdi de birlikte öz muzıkanı diñlemege, kino baqmaga fırsatımız bar. Bu fırsatnı şimdi tutıp alacaq olalar. İç te mümkün olmağan bir şey», – dedi yırcı Qırım.Aqiqat mühbirine.
Camala Qırımnıñ şimdiki reberligi üç devlet tilini ilân etkenini – rus, ukrain ve qırımtatar, ve, bunıñ ile, Qırımda yaşağan halqlarnıñ medeniy inkişafına keder etmemek söz bergenini hatırlattı.
Yırcı Qırım yolbaşçılığına ATRni qapatmamaq içün ikmeti yetecegine ümüdini bildirdi.
«Qırımtatar medeniyetini saqlağan yekâne merkezi olğan ATRni qaldırırlar degen ümettem», – dedi o.
Cumaertesi, mart 28 künü, Kiyevde Mustaqillik Meydanında ATR yekâne qırımtatar telekanalına qol tutuv numayışı keçti.
Malüm olğanı kibi, ATR Rusiye qanunlarına köre qayd olmağa ne qadar tırışsa da, Roskomnadzor menfiy cevap bere. Telekanal tahmin ete ki, aprel 1-den itibaren yayınları toqtatıla bile. Bu sebepten Rusiye prezidenti Vladimir Putinge bir sıra muracaat yollanılğan edi.
