Yaqında New Yorkqa köçken qırımtatarı Rustem Rustemov dünyada yekâne qırımtatar ATR telekanalını ingliz tilinde öldürmemege çağırğan insanlarnı kamerağa çekti
«Qırımda doğıp büyüdim, yaqında New Yorkqa keldim, – denile YouTube ağına yüklenilgen rolikniñ başında. – Vatannıñ tışında yaşağan er bir insan kibi halqımnıñ adet ve medeniyetini saqlamağa tırışam».
Rustemniñ aytqanı kibi, oña kerçek malümatnı ögrenmege yardım etken qaynaqlardan biri ATR telekanalıdır.
«ATR kanalı yalıñız Qırım medeniyetini aydınlatqan kanal degildir. ATR kanalı – halqımnıñ ses ve canı. Roskomnadzorğa muracaat etem: ATR kanalını öldürmeñiz, halqımnıñ ruhunı yoq etmeñiz. Esası, yalıñız degil, çoq olğanımıznı unutmañız», – dedi o.
Bundan soñ rolikte New York soqaqlarında farqlı insanlar ATR telekanalını öldürmemek çağıruvı ile muracaatta bulunalar.
Amerika Qoşma Ştatlarında qırımtatar diasporası ukrain diasporası ile beraber bazar künü, mart 29-da, Rusiyeniñ New Yorktaki Baş konsullığı yanında ATR telekanalına qoltutuv piketini ötkerecekler. Bunı tedbir faali Sevil Sevdiyar bildirdi. Tedbir yerli saatke köre saat 13-ten 15-ke qadar devam etecek.
Malüm olğanı kibi, ATR Rusiye qanunlarına köre qayd olmağa ne qadar tırışsa da, Roskomnadzor menfiy cevap bere. Telekanal tahmin ete ki, aprel 1-den itibaren yayınları toqtatıla bile. Bu sebepten Rusiye prezidenti Vladimir Putinge bir sıra muracaat yollanılğan edi.
Mart 24 künü Moskvada Qırımnıñ Rusiye akimiyetiniñ yolbaşçısı Sergey Aksönov ATR qırımtatar telekanalınıñ yayınlavı ile bağlı problemler mahsus ziddiyetni doğurmaq maqsadı ile yapılğan muhalifetniñ areketidir, dep aytqan edi. Bundan evel Aksönov ATR telekanalınıñ işini takbih etti ve böyle siyaseti olğan matbuat vastalarınıñ yarımadadaki işi mümkün olmağanını bildirdi.
Mart 25-den telekanal efirinde bu munasebet ile er kün «ATRni oldürmeñiz» telemarafonı keçirilecek.
