Cumaertesi, mart 28 künü, Kiyevde Mustaqillik Meydanında ATR yekâne qırımtatar telekanalına qol tutuv numayışı keçti. Buña sebep – Roskomnadzor tarafından Rusiye qanuniyetine köre qayd etüv izniniñ berilmemesidir.
Aktsiya teşebbüsçileri – Qırımtatar yaşlar merkezi, «KrımSOS» cemaat teşebbüsi, Qırımtatar halqınıñ aq-uquqlarını qoruv komiteti, haber ete Qırım.Aqiqat mühbiri.
Aktsiya iştirakçileri, esasen, gençler, Tamğa şeklinde turıp, ağzılarına skotç уаpıştırıp, ellerinde «ATRni qurtarıñız», «ATRni öldürmeñiz» ukrain, rus, qırımtatar ve ingliz tillerinde yazılğan plakatlarnı tuta ediler.
Teşkilâtçılar Ukraina prezidenti ve halqara toplulıgına muracaat etip, telekanalnıñ qapatılmasına yol bermemege çağırdılar.
Aktsiyanıñ soñunda Ukraina devlet gimni ve qırımtatar milliy marşı icra etildi. Semetdeşlerine qol tutmaq içün meydanğa belli yırcı Camala ve ressam-keramist Rustem Skibin keldiler.
Malüm olğanı kibi, ATR Rusiye qanunlarına köre qayd olmağa ne qadar tırışsa da, Roskomnadzor menfiy cevap bere. Telekanal tahmin ete ki, aprel 1-den itibaren yayınları toqtatıla bile. Bu sebepten Rusiye prezidenti Vladimir Putinge bir sıra muracaat yollanılğan edi.
