Link açıqlığı

Ukrainler Mustafa Cemilev aqqında film çıqarılmasına «KrımSOS» içün para topladılar


Qırımtatar halqınıñ lideri Mustafa Cemilev

Ukrainler qırımtatar halqınıñ lideri Mustafa Cemilev aqqında film çıqarılmasına «KrımSOS» taqımı içün para topladılar. Para «Spilnokoşt» saytında keçirildi, – dep ayttı «KrımSOS» cemaat teşebbüsinin koordinatorı Tamila Taşeva Qırım.Aqiqatqa.

Onıñ bildirgenine köre, 248 hayırsever leyhağa qoltuttı. Umumen 155 300 grivna toplandı, bu kerek olğan sermiyanıñ 104 fayızıdır.

«Ukrainlerniñ bu leyhağa qoltutqanları bizim içün pek müimdir. Zanımızca, Mustafa Cemilev qırımtatarlar içün ne qadar qıymetli olsa, ukrainler içün de o qadar qıymetlidir. Bizler «Spilnokoşt» saytında bu sermiyanı topladıq, añlaymız ki, filmniñ çerigi bile yeterli degil, amma bu isse epimiz içün emiyetlidir», – dep ayttı Tamila Taşeva.

Mustafa Cemilev aqqında filmni "KrımSOS" taqımı çıqarmaqta. Teşkilâtçılarnıñ aytqanına köre, toplanğan sermiya taqımnıñ işine, arhiv malümatlarınıñ qullanma masrafları ve ekspeditsiya seyaatlarına sarf etilecek.

Mustafa Cemilev – Ukraina vatandaşı, qırımtatar halqınıñ lideri, dünyaca belli uquq qorçalayıcısıdır. O, qırımtatarlarnıñ vatanğa avdet olması içün küreşte 15 yıldan ziyade sovet lagerleri ve apishanelerinde keçirdi. O, 306 kün sovet apishanesinde açlıq tuttı. Nobel mukâfatına namzet kösterilgen edi.

XS
SM
MD
LG