Ukraina Devlet teleradio komiteti reisiniñ birinci muavini Bogdan Çervak OSCE kütleviy haber vastalarınıñ serbestligi meseleleri boyunca vekili Dunya Miyatoviçke muracaatta bulunıp, açıq mektüpte Qırımdaki kütleviy haber vastalarınıñ vaziyetini aydınlattı. Bunı Devlet teleradio komitetiniñ resmiy saytı bildire.
«Rusiye işğalci akimiyeti matbuatnı «temizlemege» başladı: qırımtatar kütleviy haber vastalarını yarımadadan quvalar. Böylece, aprel 1-den itibaren «ATR» qırımtatar telekanalınıñ işi toqtatılması mümkün, onı Rusiye Federatsiyasınıñ qanunlarına köre yañı litsenziyanı almağa zorlaylar», – aytıla beyanatta.
Bogdan Çervaknıñ qayd etkenine köre, Qırım akimiyeti «qırımtatar kütleviy haber vastalarına duşman olaraq yanaşqanını gizlemey, qırımtatar jurnalistlerini qorquzmağa tırışa, çalışmaq imkânlarını yoq etmek içün er şey yapa».
Ukraina devlet teleradio komitetiniñ reis muaviniñ fikirince, Qırım akimiyeti qırımtatarlarğa tilini, medeniyetini, milliy ananelerini saqlap qalmağa ve inkişaf ettirmege, dinini kütmege imkân bermey.
Bogdan Çervak OSCE kütleviy haber vastalarınıñ serbestligi meseleleri boyunca vekili Dunya Miyatoviçke muracaat etip, onıñ jurnalistlerni qorumaq ve tsenzuranı toqtatmaq ricasına Qırımdaki Rusiye akimiyeti körmemezlikke urdı, dep qayd ete.
Ukraina devlet teleradio komitetiniñ reis muavini OSCE kütleviy haber vastalarınıñ serbestligi meseleleri boyunca vekilini «acele, eñ yüksek seviyede, OSCE reisligi altında Daimiy şura çerçivesinde, Rusiye ve onıñ Qırımdaki qoqla akimiyeti tarafından söz serbestligi, jurnalistlerniñ aq-uquqları, kütleviy haber vastalarındaki standartlarnıñ bozulmasını baqmağa» çağırdı.
Malüm olğanı kibi, ATR Rusiye qanunlarına köre qayd olmağa ne qadar tırışsa da, Roskomnadzor menfiy cevap bere. Telekanal tahmin ete ki, aprel 1-den itibaren yayınları toqtatıla bile. Bu sebepten Rusiye prezidenti Vladimir Putinge bir sıra muracaat yollanılğan edi.
Mart 24 künü Moskvada Qırımnıñ Rusiye akimiyetiniñ yolbaşçısı Sergey Aksönov ATR qırımtatar telekanalınıñ yayınlavı ile bağlı problemler mahsus ziddiyetni doğurmaq maqsadı ile yapılğan muhalifetniñ areketidir, dep aytqan edi. Bundan evel Aksönov ATR telekanalınıñ işini takbih etti ve böyle siyaseti olğan matbuat vastalarınıñ yarımadadaki işi mümkün olmağanını bildirdi.
Mart 25-den telekanal efirinde bu munasebet ile er kün «ATRni oldürmeñiz» telemarafonı keçirilecek.
