Qırımtatar Milliy Meclis reisiniñ birinci muavini Nariman Celâlnıñ Aqmescit rayonınıñ Biy Tanış (Pervomayskoye) köyündeki evinde keçirilgen tintüv yekünlendi. Tintüv tahminen bir saat sürdi.
Şaatlarnıñ aytqanına köre, taqiqatçılar Celâlnıñ evinden bir şey almadılar, dep bildire Qırım.Aqiqatnıñ mühbiri. Aynı vaqıtta, Qırımtatar Milliy Qurultayı Merkeziy saylav komissiyasınıñ reisi Zair Smedlâyevniñ bildirgenine köre, Celâlnıñ telefonını aldılar.
Meclis reisiniñ birinci muavini taqiqat tedbirleri aqqında jurnalistlerge tarif etip olamaycağını bildirdi, çünki onıñ malümatnı tarqatmamaq sözü bar.
O, uquq qoruyıcı organlarnıñ hadimlerine qarşı iddiaları olmağanını qayd etti.
Rusiye Taqiqat komitetiniñ taqiqatçıları Nariman Celâlnıñ evini terk ettiler. Al-azırda mında Meclis reisiniñ birinci muavininiñ soy-sopları ve tuvğanları buluna.
Malüm ki, cuma künü, mart 27-de, Qırımtatar Milliy Meclis reisiniñ birinci muavini Nariman Celâlnı «fevral 26 işi» boyunca sorğuğa çağırdılar. Sorğu beş saat devam etti. Soñra Celâl uquq qoruyıcılarnen beraber evge tintüv keçirilmesi içün yol aldı.
Mart 23 künü Taqiqat komitetinde Qırımtatar Milliy Meclis reisiniñ muavini İlmi Ümerov sorğuğa çekilgen edi. Onı Ahtem Çiygoznıñ faaliyeti ve 2014 senesi fevral 26 künü mitingniñ teşkilâtçıları aqqında sorağan ediler.
2014 senesi fevral 26 künü Qırım parlamenti yanında Qırımnıñ Ukrainadan ayırıluvına qarşı çıqqan ve qol tutqanlarnıñ kütleviy mitingi keçti. Qırımtatarlarğa, Meclis temsilcileri ve Ukraina tarafdarlarına Rusiye tarafını tutqan vatandaşlar qarşılıq kösterdiler. Soñkilerni Qırımnıñ şimdiki başı Sergey Aksönovnıñ reberliginde «Russkoye yedinstvo» yetekçileri topladılar.
