Kiyevde mart 28-de Mustaqillik Meydanında dünyada yekâne olğan qırımtatar telekanalına qoltutmaq maqsadı ile «ATRni öldürmeñiz» aktsiyası keçirilecektir. Aktsiyanıñ teşkilâtçıları Qırımtatar gençler merkezi, «KrımSOS» cemaat teşebbüsi ve Qırımtatar halqınıñ aq-uquqlarını qorçalav komiteti olalar.
«Lâqayt qalmağanlarnı telekanalnıñ qapatılmasına qarşı narazılıq bildirmege ve ATRge qoltutuv levhaları ile kelmege çağıramız. Fleşmob da ötkerilecek: aktsiya iştirakçileri ATR arifleri şeklinde turıp, foto çıqaracaqlar ve olarnı «#ATRniOldürmeñiz» hashtagi ile içtimaiy ağlarda tarqatacaqlar», – dep aytıla tedbirniñ Facebooktaki resmiy saifesinde.
Malüm olğanı kibi, ATR Rusiye qanunlarına köre qayd olmağa ne qadar tırışsa da, Roskomnadzor menfiy cevap bere. Telekanal tahmin ete ki, aprel 1-den itibaren yayınları toqtatıla bile. Bu sebepten Rusiye prezidenti Vladimir Putinge bir sıra muracaat yollanılğan edi.
Mart 24 künü Moskvada Qırımnıñ Rusiye akimiyetiniñ yolbaşçısı Sergey Aksönov ATR qırımtatar telekanalınıñ yayınlavı ile bağlı problemler mahsus ziddiyetni doğurmaq maqsadı ile yapılğan muhalifetniñ areketidir, dep aytqan edi. Bundan evel Aksönov ATR telekanalınıñ işini takbih etti ve böyle siyaseti olğan matbuat vastalarınıñ yarımadadaki işi mümkün olmağanını bildirdi.
Mart 25-den telekanal efirinde bu munasebet ile er kün «ATRni oldürmeñiz» telemarafonı keçirilecek.
