Bu daqqaları Qırımtatar Milliy Meclis reisiniñ birinci muavini Nariman Celâlnıñ Aqmescit rayonındaki Biy Tanış (Pervomayskoye) köyündeki evinde tintüv başlandı.
Qırımtatar milliy areketiniñ faali Zair Smedlâyevniñ Qırım.Aqiqatqa bergen malümatına köre, tintüvni Qırımdaki Rusiye Federatsiyası Taqiqat komitetiniñ Baş taqiqat idaresiniñ bir qaç hadimi keçire. Celâl ve adliyecisi de anda bulunalar.
Smedlâyevniñ aytqanına köre, tintüv sebebi 2014 senesi fevral 26-da olıp keçken vaqialar boyunca cinaiy iş oldı.
«Celâl bu işte şaat ola», – dep qayd etti Smedlâyev.
Onıñ bildirgenine köre, tintüv Celâlnıñ beş saatlik sorğusından soñ başlandı.
Celâlnıñ evi yanında soy-sopları ve tuvğanları toplaştılar.
Malüm ki, cuma künü, mart 27-de, Qırımtatar Milliy Meclis reisiniñ birinci muavini Nariman Celâlnı «fevral 26 işi» boyunca sorğuğa çağırdılar.
Mart 23 künü Taqiqat komitetinde Qırımtatar Milliy Meclis reisiniñ muavini İlmi Ümerov sorğuğa çekilgen edi. Onı Ahtem Çiygoznıñ faaliyeti ve 2014 senesi fevral 26 künü mitingniñ teşkilâtçıları aqqında sorağan ediler.
2014 senesi fevral 26 künü Qırım parlamenti yanında Qırımnıñ Ukrainadan ayırıluvına qarşı çıqqan ve qol tutqanlarnıñ kütleviy mitingi keçti. Qırımtatarlarğa, Meclis temsilcileri ve Ukraina tarafdarlarına Rusiye tarafını tutqan vatandaşlar qarşılıq kösterdiler. Soñkilerni Qırımnıñ şimdiki başı Sergey Aksönovnıñ reberliginde «Russkoye yedinstvo» yetekçileri topladılar.
