Qırım Yuqarı mahkemesi «Qırım Fondu» hayriye teşkilâtınıñ baş madiri Riza Şevkiyevge berilgen para cezasınıñ miqdarını 100 biñ rublege qadar eksiltti. QHA agentligi bildire ki, mahkeme şikâyet arizasını qısmen qarşılap, ceza miqdarını 350 biñ rubleden 100 biñ rublege deñiştirdi.
Şevkiyevniñ adliyecisi Cemil Temişevniñ bildirgenine köre, bu «işniñ adaletli baqılmasınıñ» neticesidir.
«Men bu qarar lâğu etilecegine, em de bir çoq cinaiy iş boyunca aqlama berilecegine inanmağan edim. Amma, iç olmağanda, bu ceza eksildi, çünki başta bir de bir tenbi ve qabaatsız eñ büyük ceza berilgen edi», – dedi Temişev.
Yanvar 29-da Aqmescitte «Qırım» Fondu hayriye teşkilâtınıñ ekinci mahkemesi keçirilgen edi. Toplaşuvda Aqmescit şeeri Kiyev rayon mahkemesiniñ 4,5 million rublelik para cezasını bermek qararına şikâyet baqıldı.
Keçken sene noyabr ayında Qırımnıñ medeniy mirasnı qorçalav devlet komiteti memuriy protokolnı tizip, «Qırım» Fondu HT baş müdiri Riza Şevkiyev Rusiye Federatsiyası Memuriy bozuvlar kodeksiniñ 7.13 maddesi 1-inci qısmına köre («Rusiye Federatsiyası halqlarınıñ medeniy mirası obyektleriniñ saqlap qaluv, qullanuv ve devlet imayesi talaplarını bozuv») memuriy cinayet yaptı kibi qarar çıqardı.
