2015 senesi mart 9-da miting, numayış keçirilmesi qaideleriniñ bozulmasında qabaatlanğan Qırım faali Kurtseit Abdullayevniñ mahkemesi mart 30-ğa qaldırıldı. Bunı cuma künü, mart 27-de, Qırım.Aqiqat mühbiri bildirdi.
Mahkemeci Abdullayevniñ iş malümatlarını ögrenmek ve adliyecini celp etmek muracaatını qabul etti. Mahkeme mart 30-da keçirilecektir.
Qurultay Merkeziy saylav komissiyasınıñ reisi Zair Smedlâyev Aqmescitte Ukraina timsallerinden sebep daa bir faal – Kurtseit Abdullayevni mahkeme eteceklerini bildirgen edi.
Onıñ malümatına köre, Kurtseit Abdulayev «Ukraina devlet bayrağınıñ qullanmasında qabaatlana».
Mart 9-da Aqmescitte politsiya hadimleri ukrain şairi Taras Şevçenkonıñ hatırasına keçirilgen mitingniñ teşkilâtçısı Leonid Kuzmin ve aktsiyanıñ daa eki iştirakçisi Aleksandr Kravçenko ve Vilidar Şukurciyevni yaqaladılar. Politsiya vekilleriniñ aytqanına köre, yaqalav sebebi mitingde qullanılğan ukrain timsalleri oldı.
