Link açıqlığı

Qırımtatar Milliy Meclis reisiniñ birinci muavini Nariman Celâlnıñ sorğusı dört saat devam ete. Faalni Aqmescitte Trenöva soqağına yerleşken Qırım Taqiqat komitetiniñ Baş taqiqat idaresinde sorğuğa çekeler.

Qırım.Aqiqat mühbiri aytqanı kibi, taqiqat komitetine mart 27 künü qırımtatar faali Asan Çaruhovnı da çağırğan ediler. Faali endi «fevral 26» işi boyunca sorğuğa çekilgen edi.

Bildirilgeni kibi, mart 27 künü Qırımtatar Milliy Meclis reisiniñ birinci muavini Nariman Celâlnı «fevral 26» işi boyunca sorğuğa çağırdılar.

Mart 23 künü Taqiqat komitetinde Qırımtatar Milliy Meclis reisiniñ muavini İlmi Ümerov sorğuğa çekilgen edi. Onı Ahtem Çiygoznıñ faaliyeti ve 2014 senesi fevral 26 künü mitingniñ teşkilâtçıları aqqında sorağan ediler.

2014 senesi fevral 26 künü Qırım parlamenti yanında Qırımnıñ Ukrainadan ayırıluvına qarşı çıqqan ve qol tutqanlarnıñ kütleviy mitingi keçti. Qırımtatarlarğa, Meclis temsilcileri ve Ukraina tarafdarlarına Rusiye tarafını tutqan vatandaşlar qarşılıq kösterdiler. Soñkilerni Qırımnıñ şimdiki başı Sergey Aksönovnıñ reberliginde «Russkoye yedinstvo» yetekçileri topladılar.

XS
SM
MD
LG