Link açıqlığı

Qırım akimiyeti, buña Moskva emri olsa, Qırımda özek silânıñ olmasına qarşı çıqmaycaq. Bunı «Sputnik» agentligine Qırım başı Sergey Aksönov bildirdi.

«Yuqarı baş komandanı böyle bir emir berse, biz oña qol tutarmız», – dedi Aksönov.

Bunıñ ile Aqyar valisi Sergey Menâylo «Ren-TV» kanalınıñ efirinde jurnalistniñ özek silâ aqqında sualine Rusiye yolbaşçılığı bunı talap etse, qarşı çıqmaycağını bildirdi.

«Devletniñ arbiy-siyasiy yolbaşçılığı, mudafaa nazirligimiz bar, silâlı quvetlerniñ ögünde turğan vazifeler bar ve quvetlerniñ yerleşüvi bu vazifelerge uyğun kele. Olğan telükelerge köre, Qırımda qarşılıq köstere bilecek quvetler yerleşecektir», – dedi Menâylo.

Evel Rusiye tış işlep naziri Sergey Lavrov Rusiye Federatsiyasında Qırımda özek silânı yerleştirmek maqsadı olğanını bildirgen edi.

2014 senesi fevralniñ soñunda – martnıñ başında Rusiye ve Rusiyeniñ Qara deñiz flotunıñ qırım bölüklerinden ordular Qırım yarımadanı zapt ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar

XS
SM
MD
LG