Link açıqlığı

Celâl: Qırımda tolerantlıqnıñ inkişafı içün qırımtatar tiliniñ ögrenüvi ğayet müimdir


Qırımtatar Milliy Meclis reisiniñ birinci muavini Nariman Celâl Devlet Şurası spiker muavini Remzi İlyasovnıñ teklif etken Qırımda devlet tilleriniñ qullanuvı aqta qanun leyhası Qırım ve qırımtatarlar içün kelişken bir şekilde qabul etileceginden şübe ete. Bunı Celâl cumaaqşamı künü mart 26-da Qırım.Aqiqat mühbirine bildirdi.

«Qanun leyhasındaki ğayeler daa «tünevin» amelge keçirilecek edi. Mında şunı qayd etmek kerek: birinciden, qırımtatar tilini er bir talebe ögrenmek kerek edi, bugünge bizde Qırım tillerinden biri – daa doğrusı Qırım tamır halqınıñ tilini bilgen bir, belki, birden de ziyade nesilimiz olur edi. Ekinciden, er bir qırımtatarı bütün resmiy müessise ve akimiyet organlarında suallerine ana tilinde cevap ala ve laf ete bile edi. Teessüf ki, bugün böyle bir şey olsa da, bir sıra manialardan keçmek kerek», – dey Nariman Celâl.

Qırımtatar Milliy Meclis reisiniñ birinci muavini şunı da qayd etti ki, qırımtatar tilini yarımadanıñ er bir sakini ögrenmek kerek.

«Tilni ögrenmege qıyın olğanı ile bağlı laflar yersizdir, menimce. Diger milletlerniñ balalarından tilniñ mükkemel seviyede bilgenini kimse talap etmey, eñ azından, başlanğıç seviyede ola bile. Men, oca olaraq, balalar olarğa berilgen er şeyni qolaylıqnen ögrengenini eminliknen ayta bilem. Menimce, Qırımda tolerantlıqnıñ inkişaf etmesi içün qırımtatar tiliniñ ögrenilmesi ğayet emiyetlidir. Şimdi parlament, cumhuriyet başlarınıñ aytqanlarını köz ögüme alıp, qanun leyhasınıñ qırımtatarlar içün kelişken bir şekilde qabul etileceginden şübe etem», – dedi o.

Evel Qırım spiker muavini Remzi İlyasov Qırım Cumhuriyeti Devlet Şurasına «Qırım Cumhuriyetinde devlet ve diger tillerniñ qullanuvı aqqında» qanun leyhasını kirsetti. Vesiqağa köre, qırımtatar, ukrain tilleriniñ, rus tili ile bir sırada, cumhuriyetniñ oquv yurtlarında ögrenilmesi farz olmalıdır.

XS
SM
MD
LG