Link açıqlığı

Qırımtatar faalleri Rusiye ve Ukraina ziyalıları ve uquq qoruyıcılarını ATRnı qurtarmağa çağıralar


«Mustaqil qırımtatar matbuat vastalarını qoruv halqara komiteti» teşebbüs gruppası Rusiye, Ukraina ve diger memleketlerniñ ziyalıları ve uquq qoruyıcılarına muracaatta bulunıp, ATR ve qırımtatatarlarnıñ diger mustaqil matbuat vastalarını qorumağa çağırdı.

Bu aqta Qırım.Aqiqatta olğan beyanatnıñ metninde yazıla.

«Farqlı zenaat saiplerimiz, amma er birimizni qırımtatar milliy matbuat vastalarınıñ taqdiri raatsız ete. Qırımtatarlar içün ATR telekanalı ayat qısmı, tuvğan topraqlarında ğayrıdan doğuv timsali ola. Bu vaqıt içersinde kanal taqımı seyircisini tapqan hususiy televizion malnı işlep çıqardı», – denile beyanatta.

Faallerniñ sözlerine köre, sürgünlik ve avdet qıyınlıqlarından keçken qırımtatarlar içün «ATR bu ağır yıllar devamında coyulğan adet ve tilniñ ğayrıdan tiklenüvine imkân bergen bir fırsattır».

Cemaatçılar ATR ve diger qırımtatar matbuat vastalarına qol tutmağa çağıralar ve Mustaqil qırımtatar matbuat vastalarını qoruv halqara komitetiniñ teşkil etilecegi aqta ilân eteler.

Muracaatnı Qırım jurnalist ve medeniyet erbapları imzaladı: Ayder Mujdabayev, Muhamed Ali Sulaymanov, Zarema Trasinova, Seytabla Memetov, Güliver Altin, Mayre Lüman.

XS
SM
MD
LG