Rusiye Federatsiyasınıñ prezidenti yanında vatandaşlar cemiyetiniñ inkişafı ve insan aqları şurası Roskomnadzorğa muracaatta bulunıp, qırımtatar kütleviy haber vastalarınıñ ğayrıdan qayd oluv sebeplerinden qapatılmasına yol bermemege çağırdı. Bunı İAŞ saytı bildire.
«Qırımda yıllardır çalışqan eki qırımtatar telekanalı ve radiosı Rusiye uquq alanından tış qalıp, işini toqtatmaq mecbur olacaqları cemiyette menfiy keyfler olmasınıñ sebebi ola. Qırımtatar halqınıñ bir çoq temsilcisi bu kütleviy haber vastalırını milliy variyet olaraq tanıp, til, medeniyet, ananelerniñ canlandırılması ve ilerilemesine ümüt ete», – aytıla Şura reisi Mihail Fedotovnıñ beyanatında.
ATR Rusiye qanunlarına köre qayd olmağa ne qadar tırışsa da, Roskomnadzor menfiy cevap bere. Telekanal tahmin ete ki, aprel 1-den itibaren yayınları toqtatıla bile. Bu sebepten Rusiye prezidenti Vladimir Putinge bir sıra muracaat yollanılğan edi.
Mart 24 künü Moskvada Qırımnıñ Rusiye akimiyetiniñ yolbaşçısı Sergey Aksönov ATR qırımtatar telekanalınıñ yayınlavı ile bağlı problemler mahsus ziddiyetni doğurmaq maqsadı ile yapılğan muhalifetniñ areketidir, dep aytqan edi. Bundan evel Aksönov ATR telekanalınıñ işini takbih etti ve böyle siyaseti olğan matbuat vastalarınıñ yarımadadaki işi mümkün olmağanını bildirdi.
Mart 25-den telekanal efirinde bu munasebet ile er kün «ATRni oldürmeñiz» telemarafonı keçirilecek.
