Link açıqlığı

Rusiye uquq qorçalayıcısı: ATR qapatılması yalıñız qırımtatarlarğa zarar ketirmeycek


Rusiye prezidenti yanında İnsan aqları şurasınıñ azası Andrey Yurov

ATR qırımtatar telekanalı qapatılsa, büyük belâ çıqacaq, em de yalıñız qırımtatarlar zarar körmeycekler, – dep bildirdi Rusiye prezidenti yanında İnsan aqları şurasınıñ azası Andrey Yurov Qırım.Aqiqatqa.

«Birinciden, Qırımnıñ devlet tili olğan qırımtatarcanıñ asılında böyle olmağanı, ve oña diqqat ayırılmağanını kösterilecek. Ekinciden, yerli akimiyetniñ qırımtatarlarnıñ ihtiyaclarına emiyet bermegeni belli olacaq», – dedi Yurov.

Uquq qorçalayıcınıñ fikirince, bir çoq qırımtatarı içün ATR malümat çoqrağı ola.

«Telekanal qapatılsa, qırımtatrlarnıñ şimdiki akimiyetke munasebetke menfiy olacaq, bu da yahşı bir şey degil», – dedi Andrey Yurov.

ATR Rusiye qanunlarına köre qayd olmağa ne qadar tırışsa da, Roskomnadzor menfiy cevap bere. Telekanal tahmin ete ki, aprel 1-den itibaren yayınları toqtatıla bile. Bu sebepten Rusiye prezidenti Vladimir Putinge bir sıra muracaat yollanılğan edi.

Mart 24 künü Moskvada Qırımnıñ Rusiye akimiyetiniñ yolbaşçısı Sergey Aksönov ATR qırımtatar telekanalınıñ yayınlavı ile bağlı problemler mahsus ziddiyetni doğurmaq maqsadı ile yapılğan muhalifetniñ areketidir, dep aytqan edi. Bundan evel Aksönov ATR telekanalınıñ işini takbih etti ve böyle siyaseti olğan matbuat vastalarınıñ yarımadadaki işi mümkün olmağanını bildirdi.

Mart 25-den telekanal efirinde bu munasebet ile er kün «ATRni oldürmeñiz» telemarafonı keçirilecek.

XS
SM
MD
LG