Mart 26-da saba Rusiye Fevqulâde vaziyetler hızmetiniñ 22-nci maşinalar kolonnası Rusiye FVH qurtarıcı merkezinden çıqıp, Rusiye-Ukraina sıñırından keçti. Bunı Rusiye FVH matbuat hızmeti bildirdi.
«Donetsk ve Lugansk vilâyetleri içün gumanitar yardım» kolonnası «Matveyev – Kurgan» ve «Donetsk» kişir noqtalarında sıñırdan keçip, Donetsk ve Lugansk yoluna devam etti.
FVH malümatına köre, 140 maşinadan ziyade Lugansk ve Donetsk vilâyetlerine 1600 tonnadan ziyade gumanitar yardımnı alıp ketecekler.
Noginsk FVH qurtarıcı merkeziniñ yolbaşçısı Aleksandr Lekomtsev bildire ki, «gumanitar yardım ketirilmesi boyunca tedbirler halqara qaidelerge köre» keçirildi, Rusiye «gumanitar yükü" ise «vaziyetni eyiliştirmek ve gumanitar felâketke yol bermemek içün» yollanıldı.
Ukraina dey ki, Rusiye Ukraina iznini almayıp, bunıñ kibi «gumanitar konvoylarnı» kirsetilmesinen Ukraina ve halqara qanunlarını bozmaqta. Ukraina ve Qızıl Haç Halqara komiteti bu «gumanitar yardımlarnı» qabul etmekten ve ozğarmaqtan vazgeçeler, çünki Rusiye yük aqqında malümatnı bermey.
Ukraina bildire ki, bunıñ kibi «yükler» kirsetilgen soñ separatistlerniñ ücümleri quvetleşe. Bundan ğayrı, ukrain tarafı bildire ki, bu maşinalar ile Donbass zavodlarından donatmalar ve elâk olğan rusiyelilerniñ cesedleri çıqarıla edi.
Rusiye tarafı maşinalarda yalıñız kerek şeyler bar olğanını bildire. Faqat bugünge qadar Ukraina gumanitar yükni baqıp olamadı.
