Ukrainanıñ Donetsk vilâyetindeki Atremovsk rayonında adamlarnı Artemovsktan Gorlovkağa alıp ketken avtobus separatistler tarafından açılğan ateş altında qaldı, eñ azından dört kişi elâk oldı, dep haber ete Donetsk vilâyetiniñ militsiyası. Bunı Radio Svoboda bildire.
Donetsk vilâyetiniñ devlet memuriyeti bildire ki, 17 insan yaralandı. Olardan 15 kişi hastahanege alıp ketirildi. Dört adamnıñ alı ağır, daa birisiniñ – pek ağırdır.
İçki işler nazirliginiñ vilâyetteki baş idaresiniñ malümatına köre, 4 adam elâk oldı ve 19 kişi yaralandı.
Avtobus Mayorsk civarındaki blokpostunı keçecek edi. Artemovsk şeer bölüginiñ içki işler yolbaşçısı Dmitriy Kojuhovskiyniñ aytqanına köre, dört elâk olğan insan – qadınlardır. Avtobusta 26 yolcu bar edi, dep bildirdi Donetsk vilâyetiniñ içki işler nazirligi baş idaresiniñ yolbaşçısı Vâçeslav Abroskin.
«Terroristlerniñ açqan toplar ücümi ukrain acele yardım maşinalarına yaralanğanlarğa yardım etmek içün keçmege imkân bermey edi», – dep yazdı Donetsk vilâyetiniñ içki işler nazirligi baş idaresiniñ yolbaşçı muavini İlya Kiva Facebook saifesinde.
Mayorsktaki blokpost Ukraina nezareti altında olğan Artemovsk ve boyevikler zapt etken Gorlovka arasında sıñırda yerleşmekte.
