Kiyevde mart 26-da «Docudays UA» Halqara İnsan aqları kino festivalinde «Qırım künü» keçirilecek, dep haber ete Qırım.Aqiqat.
Festivalniñ Facebooktaki resmiy saifesinde bildirile ki, tedbirde cemaat erbapları, faal, rejissör ve jurnalistler Qırım işğali yılınıñ aqibetlerini muzakere etip, yarımada aqqında filmni taqdim etecekler.
Saat 12:00 Kino evinde «Qırımda insan aqları içün işğal aqibetleri» matbuat brifingi başlaycaq. Tedbirde İnsan aqları Qırım alan missiyasınıñ reis muavini Olga Skripnik, İnsan aqları aqqında malümat merkeziniñ idare reisi Tatyana Peçonçik, Ukrainada Amnesty International vekili Bogdan Ovçaruk, Amnesty International Ukraina tedqiqçisi Krasimir Yankov iştirak etecekler.
Soñra Kseniya Cornonıñ «Qırım» filmi taqdim etilecek. Onı 2014 senesi işğal etilgen yarımadada yaşağan qırımtatarlarnıñ bir qaç nesili aqqında çıqarğan ediler.
Levha kösterilgen soñ rejissör ve davet etilgen eskpertlerniñ iştiraki ile subet keçirilecektir. Bunıñnen beraber, «Qırım. Bir yıl soñra» munaqaşasınıñ ötkerilmesi planlaştırıla. Teşkilâtçısı «ArtPole» agentligi ola.
