Qırım müftisi acı Emirali Ablayev mart 24-te Qırımğa Rusiye siyaset, cemaat ve din erbabı Magomed Magomedovnıñ yolbaşçılığında kelgen Dagestan eyyeti ile körüşti. Bunı çarşenbe künü, mart 25-te, Qırım musulmanları diniy idaresiniñ matbuat hızmeti bildire.
«Müfti Dagestan Cumhuriyetiniñ yolbaşçısı Ramazan Abdulatipovğa ve Dagestan ükümetine, Dagestan müftisi şeyh Ahmad-acı-Abdulayevge, em de Qırım musulmanlarına cami ve diger diniy müessiselerniñ qurucılığı ve tamiri ile bağlı leyhalarnı ömürge keçirmege yardım etken Dagestan iş adamlarına teşekkürler bildirdi», – aytıla beyanatta.
Magomed Magomedov bildirdi ki, Dagestan Qırım musulmanları diniy idaresine yardım etmege azır.
Onıñ aytqanına köre, Qırım ve Dagestan Cumhuriyeti arasında munasebetlerniñ pekitilmesi ile oğraşqan mesleatçı İzrail Kebedov dagestanlılar ve Qırım Müftiyatı arasında areketlerniñ belgilemesinden mesüliyetini boyunına aldı.
QMDİ matbuat hızmeti qayd ete, Magomed Magomedov Qırımda eki aftadan ziyade bulunıp, Qırım reberligi ile bir sıra resmiy körüşüv keçirdi.
