Qırım yolbaşçısı Sergey Aksönov çarşenbe künü, mart 25-te, Moskvadaki brifingde bildirdi ki, qırımlılar «vatanperver olıp, Rusiye ordusında hızmet etmege azırlar». Qırım ükümetiniñ matbuat hızmeti bildire ki, Aksönov qırımlılar «ordunıñ vazifesi devletni imaye etmek olğanını añlaylar», dep qayd etti.
«Qırımlılardan iç birisi qaçınmaycaq. Bu sene eki biñden beş biñge qadar adam askerlikke çağırılacaq. Vesiqalar resmiyleştirile, esnas devam etmekte. Qırımlılar Rusiye Federatsiyası seviyesinde askerlik borcunı yerine ketirecekler», – dedi Aksönov.
«Kimseniñ şübesi de yoq. Rusiyede olğan esnaslarğa alışalar. Er kes, millet mensüpligine baqmadan, hızmet etecek, er kes içün aynı şaraitler yaratılacaq», – dedi o.
Malüm olğanı kibi, Rusiye Devlet duması cuma künü, mart 20-de, Qırım ve Aqyar sakinleriniñ askerlikke çağıruv qanunını qabul etti.
Vesiqağa binaen, askerlik yapqan ya da Ukrainada askerlikke çağırılması lâğu etilgen adamlar hızmet etmeycekler. Rusiye qanunlarına köre tasil aqqında alim derecesi olğan vatandaşlar askerlikke çağırılmaycaqtır.
