ATR telekanalı ve Media Holdingge kirgen diger kütleviy haber vastalarına qoltutmaq içün yapılğan muracaatlarğa Qırğızistan qırımtatarları da qoşuldı.
Olar Rusiye prezidenti Vladimir Putinge muracaatta bulunıp, qırımtatar matbuat vastalarınıñ müimligini ve diger türk halqları arasında populâr olğanını qayd eteler. Diger muracaatlarda qayd etilgeni kibi, mında da Rusiye prezidentiniñ reabilitatsiya buyruğına esaslanıp, milletlerara munasebetlerde menfiy aqibetler olacağını aytalar.
ATR Rusiye qanunlarına köre qayd olmağa ne qadar tırışsa da, Roskomnadzor menfiy cevap bere. Telekanal tahmin ete ki, aprel 1-den itibaren yayınları toqtatıla bile. Bu sebepten Rusiye prezidenti Vladimir Putinge bir sıra muracaat yollanılğan edi.
Mart 24 künü Moskvada Qırımnıñ Rusiye akimiyetiniñ yolbaşçısı Sergey Aksönov ATR qırımtatar telekanalınıñ yayınlavı ile bağlı problemler mahsus ziddiyetni doğurmaq maqsadı ile yapılğan muhalifetniñ areketidir, dep aytqan edi. Bundan evel Aksönov ATR telekanalınıñ işini takbih etti ve böyle siyaseti olğan matbuat vastalarınıñ yarımadadaki işi mümkün olmağanını bildirdi.
Mart 25-den telekanal efirinde bu munasebet ile er kün «ATRni oldürmeñiz» telemarafonı keçirilecek.
